ចោរញីឈ្មោលដើរលួចម៉ូតូ ត្រូវអស់លក្ខណ៍
11-July-2016 | ដោយ មែន កំសត់
ខេត្តសៀមរាប ៖ កម្លាំងការិយាល័យនគរបាលព្រហ្មទណ្ឌកម្រិតស្រាល នៃស្នងការខេត្តសៀមរាប ដឹកនាំកម្លាំងក្រោមឱវាទ ដោយលោកវរសេនីយ៍ទោ ហង្ស សូផាតភីរម្យ នាយការិយាល័យនគរបាលព្រហ្មទណ្ឌកម្រិតស្រាល នៃស្នងការខេត្ត បានចុះប្រតិបត្តិការស្រាវជ្រាវករណីចោរលួចមានស្ថានទម្ងន់ទោស រហូតឈានដល់ធ្វើការឃាត់ខ្លួនបានជនសង្ស័យ ២នាក់ប្តីប្រពន្ធ រួចនាំយកមកកាន់ការិយាល័យជំនាញ ដើម្បីធ្វើការសួរនាំ។
ហេតុការចុះបង្ក្រាបករណីខាងលើនេះធ្វើឡើងនៅថ្ងៃទី០៩ ខែកក្កដា ឆ្នាំ២០១៦ស្ថិតនៅចំណុចផ្លូវ៣០ម៉ែត្រ ក្នុងភូមិត្រពាំងសេះ សង្កាត់គោកចក ក្រុងសៀមរាប។ លោកវរសេនីយ៍ទោ ហង្ស សូផាតភីរម្យ នាយការិយាល័យនគរបាលព្រហ្មទណ្ឌកម្រិតស្រាល នៃស្នងការខេត្ត បានប្រាប់កោះសន្តិភាពនៅរសៀលថ្ងៃទី១០ ខែកក្កដា ឆ្នាំ២០១៦នេះថា យោងតាមពាក្យបណ្តឹងរបស់ជនរងគ្រោះឈ្មោះ សុខ ណាវី ភេទស្រីអាយុ២៣ឆ្នាំ មុខរបរលក់ដូរ រស់នៅក្រុមទី៤ ភូមិវត្តបូព៌ សង្កាត់សាលាកំរើក ក្រុងសៀមរាប ម៉ូតូដែលត្រូវចោរលួចនោះកាលពីថ្ងៃទី២៣ ខែមិថុនា ឆ្នាំ២០១៦ ខណៈជនរងគ្រោះបានចតម៉ូតូម៉ាក ZOOMER-X ពណ៌ស ស៊េរីឆ្នាំ២០១៦ ទុកនៅមុខហាងលក់ខោអាវរបស់ខ្លួន ដែលទើបនឹងទិញ បង់រំលស់បានប៉ុន្មានថ្ងៃប៉ុណ្ណោះ។
លោកបន្តថា ជនសង្ស័យ២នាក់ប្តីប្រពន្ធមាន (ប្តី)ឈ្មោះ កែវ ប៊ុនធី អាយុ២១ឆ្នាំ និងប្រពន្ធឈ្មោះ អ៊ឹម សុផានាថ អាយុ២១ឆ្នាំ ស្នាក់នៅបន្ទប់ជួល ភូមិបឹងដូនប៉ា សង្កាត់ស្លក្រាម ក្រុងសៀមរាប ព្រមទាំងដកហូតបានម៉ូតូ ដែលពួកគេបានធ្វើសកម្មភាពលួចយកម៉ូតូរបស់ជនរងគ្រោះ។ ក្រោយពីធ្វើការឃាត់ខ្លួនបានជនសង្ស័យ២នាក់ប្តីប្រពន្ធខាងលើ ពួកគេបានសារភាពថា មុនធ្វើសកម្មភាព ពួកគេបានពិភាក្សាគ្នាថា យើងត្រូវតែដើរលួចម៉ូតូគេនៅក្នុងក្រុងសៀមរាប បន្ទាប់ពីបានឯកភាពគ្នារួច ពួកគេបានទៅខ្ចីម៉ូតូអ្នកជិតខាងជិះពេញក្នុងក្រុងសៀមរាប រហូតមកដល់កន្លែងលក់ខោអាវ ស្ថិតនៅក្រុមទី៤ ភូមិវត្តបូព៌ សង្កាត់សាលាកំរើក ក្រុងសៀមរាប ក៏ឃើញម៉ូតូម៉ាក ZOOMER-X ពណ៌ស ស៊េរីឆ្នាំ២០១៦ របស់ជនរងគ្រោះចតទុកចោលនៅមុខហាង ឃើញឱកាសល្អហុចឱ្យ ដោយមានសោជាប់នៅនឹងម៉ូតូផង ក៏នាំគ្នាចូលទៅបន្លំលួចយកជិះចេញតែម្តង។
លោកបានបញ្ជាក់បន្ថែមថា ក្រោយពីជនសង្ស័យ២នាក់ប្តីប្រពន្ធលួចបានសម្រេចអស់រយៈពេលជិត១ខែ ទើបកម្លាំងជំនាញរបស់ការិយាល័យនគរបាលព្រហ្មទណ្ឌកម្រិតស្រាល នៃស្នងការខេត្ត យើងបានចុះស្រាវជ្រាវ រហូតឈានដល់ធ្វើការឃាត់ខ្លួនបាននៅថ្ងៃទី០៩ ខែកក្កដា ឆ្នាំ២០១៦ នៅចំណុចផ្លូវ៣០ម៉ែត្រ ក្នុងភូមិត្រពាំងសេះ សង្កាត់គោកចក ក្រុងសៀមរាប ខណៈដែលជនសង្ស័យកំពុងជិះម៉ូតូ ។ បច្ចុប្បន្នជនសង្ស័យ២នាក់ប្តីប្រពន្ធ ត្រូវបានកម្លាំងជំនាញរៀបចំកសាងសំណុំរឿងបញ្ជូនទៅតុលាការនៅព្រឹក ថ្ងៃទី១១ ខែកក្កដា ឆ្នាំ២០១៦ ដើម្បីចាត់ការតាមផ្លូវច្បាប់ ចំណែកម៉ូតូ ត្រូវបានប្រគល់ឱ្យម្ចាស់វិញ៕
ចំនួនអ្នកទស្សនា
- ថ្ងៃនេះ41
- ម្សិលមិញ12101
- សប្តាហ៍នេះ12151
- ខែនេះ127301
- ឆ្នាំនេះ127301
- សរុប20569757